රැකියා විරහිත උපාධිධාරීන්ගේ වීදි සටන් හා ඊට ශ්‍රී ලංකා පොලීසියෙන් ලැබෙන ප්‍රතිචාර දැන් අපට අලුත් යමක් නොවේ.මෙරට නිදහස් අධ්‍යාපනය තුළින් ලැබිය හැකි ඉහළම අධ්‍යාපනය ලබා රැකියා විරහිතයන් බවට පත්වීම සැබෑම ගැටලුවක් වන්නාසේම,ඊට එරෙහිව කරන සටනින් නගර අවහිර වී සාමාන්‍ය ජන ජීවිතයට වන මහත් හිරිහැරයද අමතක කළ නොහැකි ගැටළුවකි.මෙවන් සිද්ධි පෙළක ආසන්නතම උදාහරණය සටහන් වන්නේ ඊයේ කොළඹ කොටුව ආසන්නයේ සිදුවූ සිදුවීමය.උපාධිධාරීන් දහස් ගණනක් පොලීසියෙන් කඳුළු ගෑස් කමින්,ගුටි බැටවලට ලක් වෙමින්,මහජනයාගේ මහත් අප්‍රසදායට ද ලක්වූ අතර එහි නිමාව සටහන් වූයේ 25 දෙනෙකු පොලිස් අත්අඩංගුවට ද පත් වෙමිනි.
මෙය දේශපාලන කුමන්ත්‍රණයක් ලෙස හුවා දක්වමින් ආණ්ඩුව තම ජනප්‍රියතම බයිලාවෙන් ෂේප් න්‍යාය අනුගමනය කළද ඉන් එහා මෙවන් දෑ සිදු නොවන්නට එය හේතුවක් වන්නේ නැත.25 දෙනෙකු අත්අඩංගුවට ගැනීමම තවත් සටනකට හේතුවක් කර ගන්නට මෙම සටන් කරුවන් ක්‍රියා කරනු ඇත.මේ අනුව ආණ්ඩුව නොදැනුවත්වම තමා පවසන කුමන්ත්‍රණකාරීන්ට රට අස්ථාවර කිරීමට ඉඩ ලබා දී ඇත්ද?
සැබැවින්ම මේ පසු පස සිටින්නේ කවුද?මෙවන් වීදි සටන් හා උද්ඝෝෂණ පසුපස ජ.වි.පෙ. සිටින්නේ යැයි බොහෝ දෙනෙකු පවසන්නා සේම මෙහි යථාර්තය ද ඊට එහායින් ඇති දෙයක් නොවේ.සැබැවින්ම ජ.වි.පෙ. ට රජය අපහසුතාවට පත් කිරීමේ බලවත් උවමනාවක් ඇති බව නොරහසකි.ඒ සඳහා තමා සතු සියලු බලයන් පෙළ ගස්වන්නට ඔවුහු මේ මොහොතේ පසු බට නොවෙති.මෙම සටනේ මෙහෙයවන්නා වූ සුජිත් කුරුවිට පැහැදිලිවම ජ.වි.පෙ. ක්‍රියාකාරිකයෙකි.උතුරු මැද පළාත් සභාවට තරඟ කිරීමෙන් මන්ත්‍රී ධුරය අහිමි වූ වසන්ත සමරසිංහ වෙනුවට ජ.වි.පෙ. න් මී ළඟට මැති සබයට යන්නට හිටියේ සුජිත් කුරුවිටය.එහෙත් සන්ධාන රජය එම මන්ත්‍රී ධුරය ද හොරා කෑම නිසා අද රජයට එරෙහි වීදි සටන් මෙහෙය වන්නට සුජිත් කුරුවිට ඉතිරි වී ඇත.එහෙත් ප්‍රශ්නය මෙය නොවේ.මෙය ජ.වි.පෙ. පිට පටවා ඇඟ බේරා ගැනීමට ආණ්ඩුවට නොහැකිය.මන්ද ඊයේ කොළඹට රැස් වූ සියල්ලන් තවමත් සැබෑවටම රැකියා විරහිතයන් වන නිසාය.
ජ.වි.පෙ.ට වුවද වෙනත් දේශපාලන බලවේගයකට වුවද මෙවන් උද්ඝෝෂණ පසු පස රැගෙන යන්නට තරම් පිරිසක් ගොඩ නැගී තිබේ.තනි තනිව රැකියා ඉල්ලා සිටින්නට නොහැකිව අසරණ වන්නන් කවුරුන්ගේ හෝ අතේ එල්ලී වෙර දරන්නේ ඒ හරහා තමාට රැකියාවක් ලබා ගැනීමටය.එහෙයින් මෙවන් සටන්වලට අවශ්‍ය ජන බලය පහසුවෙන් ලබා ගැනීමට සියලු සාධක පෙළ ගැසී තිබේ.එබැවින් මෙය දේශපාලන කුමන්ත්‍රණයක් ලෙස පමණක් දක්මින් මෙය මඟ හැර යන්නට ආණ්ඩුවට නොහැකි බව පැහැදිලිය.සන්ධාන ආණුඩුවද බලයට ඒම සඳහා යෞවන සිතුම් පැතුම් සෙල්ලමට ගැනීම එතරම් ගුණදායක නැත.පසු ගිය එ.ජා.පෙ. රජය රැකියා නොදීමට පැහැදිලිවම ජනප්‍රිය නොවන තීරණයක් ගත්තේය.මන්ද එය ඒ මොහොතේ කරන්නට හැකියාවක් නොතිබූ බැවිනි.එහෙත් එයට එරෙහිව බලවත් විවේචන එල්ල කළ සන්ධාන පාර්ශවය බලයට පැමිණියේ තරුණයන්ට රැකියා නොදෙන ආණ්ඩුව ගෙදර යැවිය යුතු බව කියමිනි.රජය පත් වූ විගසම එ.ජා.පෙ. රජය යොවුන් සේනාංකය වෙනුවෙන් වෙන්කර තිබූ මුදල්වලින් උපාධිධාරීන් පිරිසකට රැකියා ලබා දීමට කටයුතු කළේය.එය සිදු කරනු ලැබුවේ හුදෙක්ම තමා ඡන්දයට පෙර දුන් පොරොන්දුවක් නමට හෝ ඉෂ්ට කිරීමට පමණි.එය කිසි සේත් දූර දර්ශී තීන්දුවක් නොවේය.රැකියා ලැබූ උපාධිධාරීන්ගෙන් භාණ්ඩ හෝ සේවා නිෂ්පාදනයක් සිදු වේද යන්න ගැන තඹ දොයිතුවක් හෝ රජය කල්පනා කළේ නැත.දෙන්නම් වාලේ රැකියා දුන්හ.එබැවින් දැන් අනෙක් උපාධිධාරීන්ටත් රජයෙන් රැකියා අවශ්‍යව ඇත.රජය අනිවාර්යෙන්ම තමාට රැකියා දිය යුතුයැයි ඔවුන් බලාපොරොත්තු වේ.එසේ රැකියා දීමට නොහැකිනම් ඒ බව කෙළින් කියන්නට මේ රජය උත්සාහ නොකරන්නේ ළඟ එන මැතිවරණය නිසාය.මේ ප්‍රශ්නය හැමදාමත් එක තැන තියෙන්නේ ඒ නිසාය.
ඉදිරියේදී පත් වෙන රජයක් හෝ පවතින රජය හෝ මේ ප්‍රශ්නයට මීට වඩා ගැඹුරින් එබී බැලිය යුතුය.උපාධිධාරීන් බිහි කරන්නේ රජයේ මුදලිනි.එක් උපාධිධාරියෙකු වෙනුවෙන් රජය වැය කරන මුදල රුපියල් ලක්ෂ 2ත්,25ත් අතර වේ.එහෙත් අවසානයේ රජයට හෝ රටට එමඟින් අත්වන ප්‍රතිලාභය කුමක්ද?අද රජය උපාධිධාරීන්ට රැකියා ලබා දෙන්නේ ඔවුන් තමාට වදයක් වී ඇති නිසාය.කරදර කරන නිසාය.මෙය ඉතා ඛේදනීය තත්වයකි.මේ ප්‍රශ්නය ගැන ගැඹුරින් සලකා බැලිය යුතුයයි මා පැවසූයේ ඒ නිසාය.මෙහිදී සැලකිය යුතු කාරණා කිහිපයකි.
මුලින්ම අද බිහිවෙන උපාධිධාරීන් රැකියා වෙළඳ පොළ ඉල්ලුමට සරිලන සැපයීමක් සිදු කළ හැකි තත්වයක් සිටීද යන්න සොයා බැලිය යුතුය.මේ සඳහා වසර ගණන් පරණ වූ විෂය නිර්දේශ වෙනුවට යවත්කාළින වූ විෂය මාලාවන් ඇතුළත් කොට විෂය මාලා සංශෝධනයකට යා යුතුය.රටට වැඩිපුරම අවශ්‍ය වන්නේ කුමන උපාධිධාරීන්ද යන්න ගැන අවබෝධයකින් විශ්ව විද්‍යාල ප්‍රවේශයන් සිදු කළ යුතුය.මෙහිදී අප රැක ගත යුතු විෂයන් ඉවත් කළ යුතුයැයි කිසි විටෙක අදහස් නොකෙරේ.උදාහරණයක් වශයෙන් ඉතිහාසය,සිංහල භාෂාව වැනි විෂයන් පිළිබඳ විශාරදයන් අපට අවශ්‍යය.එහෙත් අපට එම විෂයන් හැදෑරූවන් කොපමණ අවශ්‍යද?මේවාට දළ අදහසක් හෝ තිබිය යුතුය.
අනෙක් කරුණ වන්නේ,රැකියා යනු රජයේ රැකියා පමණක් යැයි තිබෙන යල් පැන ගිය ආකල්පය වෙනස් කිරීමට කටයුතු කිරීමයි.අද උපාධිධාරී රාජ්‍ය සේවකයන්ට වඩා විශාල ලෙස වැටුප් ලබන පෞද්ගලික අංශයේ වෘත්තිකයන් ඕනෑ තරම් සිටී.ඒ අතරිනුත් විශේෂයෙන්ම ඇමෙරිකානු හා බ්‍රිතාන්‍ය අනුබද්ධිත සමාගම් විශේෂිතය.රජයේ රැකියාවන් කරන විට අප සිදු කරනුයේ අපේම මුදල් අප රට තුළම සංසරණය කිරීමය.එහෙත් ඉහත කී ආකාරයේ සමාගම් හරහා මෙරටට විශාල ලෙස ඩොලර් හා පවුම් ගලා එයි.එය රටකට ඉතා වැදගත්ය.මේ සඳහා අත්‍යවශ්‍ය වන්නේ ඉංග්‍රීසි හා පරිගණක දැනුමය.අද බොහෝ උපාධිධාරීන්ට නැත්තේද මෙයයි.එබැවින් පැලැස්තර විසඳුම් දෙනවාට වඩා එහා ගිය දැක්මකින් මේ ප්‍රශ්නය දෙස බැලීමට කාලය පැමිණ තිබේ.උපාධිධරයා දැනුමෙන් හා කුසලතාවෙන් සන්නද්ධ කොට ඔහුගෙන් රටට වැඩ ගැනීමට ක්‍රමවේදයක් සකස් කර ගත යුතුය.ඒ සඳහා සුදුසු දේශපාලන ඔලු ගෙඩියක් ඇත්තන් පාර්ලිමේන්තුවට යැවීමට අපද වග බලා ගත යුතුය.
එවිට පළමුව උපාධිය හා දෙවනුව කඳුල් ගෑස් යන මෙතෙක් රැකුණු සම්ප්‍රදායන් බිඳදමමින් අපට දියුණු වන ජාතියක් වීමට මඟ පෑ දෙනු ඇත.
If you can't read,please click on here.
Subscribe to:
Post Comments (Atom)
සබද, පලමු කොට ජාතික ගැටලුවක් සාකච්ඡා කිරීමට ආරම්භ කිරීම සම්බන්ධව මම ඔබට ස්තුථි කරමි.ඔබ ගැටලුවට හේතුව මෙන්ම පිලියමද දකින අතරම, මිලියන දෙකක් වූ ජනතාවගේ ප්‍රශ්න; ජනාධිපති නම් වූ මෙරට ස්ථාපිත චරිතය විසින් විසදිය යුතුයයි යන මතය හා තරමක් බැදී ඇති බවක් පෙන්වයි. තරමක් සිතා බලන්න,මනස වල් මිලියන දෙකකගේ ප්‍රශ්න එක මනසකට විසදීමට බාරදී ඇති ක්‍රමයහි වරද අවබෝධ කරගෙන, ජනාධිපති නම් වූ චරිතයට හිමි මනසෙහි ඇති ප්‍රශ්න විසදීමට,මිලියන දෙකක් වූ මනස වල් පෙල ගස්වමු. ඒ සදහා අත්වැල් බැද ගනිමු. ඔබට සදා ජයම වේවා!
ReplyDelete