යාඥාව - ලෙඩ සුව කිරීම - මිථ්‍යාව හා සත්‍යය

කොළඹ විහාර මහා දේවී උද්‍යානයේ පැවති ක්‍රිස්තියානි සුව කිරීමේ මෙහෙයකට සහභාගි වූ කතුන් දෙදෙනෙකු මිය යෑම සම්බන්ධයෙන් පසු ගිය කාලය පුරාම විවිධ කතිකාවන් සමාජය පුරාම ඇති වුණි.සිංහල බ්ලොග් අඩවිවලද මේ සඳහා විවිධාකාරයෙන් ලිපි පල ව තිබූ අයුරු දක්නට ලැබිණි.එහෙත් එම ලිපි හා ඒවා කියවා ඊට එක් කර තිබූ විවරණ කියවන විට මා හට හැඟී ගියේ බොහෝ දෙනෙකු තුළ මෙම කරුණු කාරණා ගැන ඇති දැනුම හා අවබෝධය අල්ප බවයි.එබැවින් මේ වෙනුවෙන් මෙම බ්ලොග් අඩවියට සටහනක් එක් කරන්නට මම කල්පනා කෙළෙමි.
මා උපතින් බෞද්ධයෙකු නොවන නමුදු අ.පො.ස. සාමාන්‍ය පෙළ දක්වා බුද්ධාගම උගෙන එය විශිෂ්ට ලෙස සමත් වුන අතර,මා කුඩා කාලයේ අප පාසලේ පන්සිල් දීම හා භාවනා කිරීම ද මෙහෙයවා තිබේ.එබැවින් බුදුන් වැඳීම,මල් පූජා කිරීමේ ගාථාවල පටන් ඇතැම් ධම්ම පදයේ එන ගාථාද මට තවමත් කට පාඩම් ය.එහෙත් මා අදහන හා විශ්වාස කරන ආගමික දර්ශනය වන්නේ ක්‍රිස්තියානියයි.ආගම් දෙක වෙන් කර හඳුනා ගැනීමක් කළ පසු මා එක් දහමක් අදහන්නට තෝරා ගත්ත ද අදටත් අනෙකුත් ආගම් දර්ශන ගැන ඉගෙනීමට තරමක් උනන්දු වෙමි.මන්ද හැම ආගමකම විවාදයට තුඩු දෙන හා බඳුන් කළ හැකි කොටස් අඩංගු වී තිබෙන නිසා ඒවා ගැන යම් ආකාරයකින් හෝ දැන සිටීම විවිධ ආගමිකයන් හා විසීමේ දී පිටුවහලක් වන බැවිනි.
කෙසේ වුවද මේ සිද්ධිය සම්බන්ධයෙන් ද අප අන්තවාදී නොවුනු තැනක සිට ප්‍රශ්නය විග්‍රහ කිරීම වටී.සියලු ආගම්වල විවිධ ඇදහීම් ක්‍රම,වත් පිළිවෙත්,විශ්වාසයන් තිබේ.ඇතැම් ඒවා සංස්කෘතිය සමඟ බැඳුනු ඒවාය.බෞද්ධයන් බෝධි පූජා හා පිරිත් සජ්ජායනය කරයි.ඒවායේ මූලික බලාපොරොත්තු ද යාඥාවෙන් බලාපොරොත්තු වන දේ හා සමානය.ඇතැම් අය ලෙඩින් දුකින් සිටින තම හිතවතුන්ගේ සුවය පතා බෝධි පූජා පවත්වයි.අපල,භූත දෝෂ දුරු වෙන්නට කියා ද බෝධි පූජා පැවැත්වීම හෝ පිරිත් සජ්ජායනය කරයි.ඇතැම් අය විභාගවලින් ජය ගැනීමට ද මෙවන් පිළිවෙත්වල යෙදෙන අතර,පසු ගිය ලෝක කුසලාන තරඟාවලියේ අවසන් තරඟයට ශ්‍රී ලංකාව පැමිණි විට රට පුරාම ඔවුන්ගේ ජය පතා බෝධි පූජා පැවැත්වුණි.එහෙත් ශ්‍රී ලංකාවට එමඟින් ජය අත් වූයේ නැත.එවිට එය බෝධි පූජාවේ හෝ,එය පැවැත් වූ ස්ථානයේ හෝ එය මෙහෙය වූ භික්ෂූන් වහන්සේගේ හෝ අඩුවක් හෝ වරදක් ලෙස කිසිවෙකු හැඳින් වූයේ නැත.තවද සුවය හා මිදීම පතා දහස් ගණනක් බෝධි පූජා ද පැවැත්වී ඉන් අදාළ පුද්ගලයා සුව නොවී මිය යන අවස්තා ඕනෑ තරම් තිබුණ ද එය ද සාකච්ඡාවට බඳුන් වන්නේ නැත.එහෙත් යාඥාවන් වලින් සුවය අත් නො වී මිය යෑම මුළු සමාජය තුළම මහත් කැළඹීමක් නිර්මාණය කර තිබේ.මෙයට හේතුව කුමක් ද?
එයට හේතුවක් තිබේ.ඒ රෝගවලට යාඥා කිරීම තරමක් වෙනස් ආකාරයකින් සිදුවන නිසාය.මෙවැනි රෝග සුව කිරීමේ මෙහෙයන් කල් තියා ප්‍රසිද්ධ කොට ජනතාවට දැනුම් දෙනු ලැබේ.සියල්ලන්ටම කිසිදු භේදයකින් තොරව ඊට ආරාධනා කරනු ලැබේ.එබැවින් නිතැතින්ම මෙම සුව මෙහෙයන් ගැන ජනයා තුළ දැඩි විශ්වාසයක් හට ගැනේ.අනෙක් අතට මෙවන් මෙහෙයන්වලට පැමිණෙන බහුතරය වෛද්‍ය ප්‍රතිකාර,බෝධි පූජා,ශාන්ති කර්ම හා නොයෙකුත් විධි ක්‍රම කොට සියල්ල අසාර්ථක වූ අයයි.එබැවින් මෙම මෙහෙය තුළින් අනිවාර්යෙන් තමාට සුවය ලැබිය යුතුයැයි ඔවුහු අපේක්ෂා කරති.එබැවින් එහි පැමිණෙන්නන්ගේ සුවය අත්කර දීම සඳහා වූ වගකීමක් නිරායාසයෙන්ම අදාළ දේව මෙහෙය පවත්වන්නන් වෙත පැවරෙන බව දැකිය හැකිය.මෑත දී වූ ආකාරයේ ගැටලු නිර්මාණය වන්නේ මෙම පැවරෙන වගකීම ඉටු නොවීම තුළය.
මෙහිදී මම එක් කරුණක් අවධානයට ලක් කරනු කැමැත්තෙමි.මෙවන් රැස්වීම්වලට ප්‍රසිද්ධ ආරාධනාවන් කොට ජනතාව කැඳවන බැවින් පැමිණෙන්නන්ට සුවය අත් කර දීමට එම දේව මෙහෙයන් පවත්වන්නන්ට වගකීමක් තිබෙන්නාක් සේම,එයට ඇතුළුවීම නොමිලේ වන නිසා හා එයට කිසිවෙකු බලෙන් කැඳවීම් නොකරන නිසා එයට සහභාගිවන්නන් ද එයින් තමාට ලැබෙන ප්‍රතිඵලය භාර ගැනීමට කැමති විය යුතුය.එහෙත් අදාළ සිදුවීම්වල දී මේ දෙයාකාරයම සිදු වී නැත.
මී ළඟට බොහෝ අය මෙවන් දෑ කිතු දහමට,බයිබලයට හෝ යේසුස් වහන්සේගේ ඉගැන්වීම්වලට එකඟ නොවන බැව් පවසා තිබෙනු දක්නට ලැබුණි.සැබැවින්ම ඒ පිළිබඳ සත්‍යය කුමක් ද?
ක්‍රිස්තුස් වහන්සේ පොළොවේ සිටින විට උන්වහන්සේ වෙතට ගෙනා විවධ රෝගීන් සුව පත් කළ සේක.අන්ධයින්,කොරුන්,බිහිරන්,කුෂ්ඨ රෝගීන්,අංශභාග රෝගීන් වැන්නන් ඒ අතර විය.උන්වහන්සේගෙන් පසු උන්වහන්සේගේ අනුගාමිකයන් ද මෙවන් දෑ සිදු කළ බව බයිබලයේ සඳහන් වේ.ඇතැම් විට ඒවා ක්‍රිස්තුස් වහන්සේ කළ දේට වඩා ප්‍රබල වූ අවස්ථා ද ඇත.වරෙක ශු.පාවුල් තුමා කළ එක් මළවුන් නැගිටීමක් මෙන්ම,ශු.පේදුරුතුමා ගේ හෙවණැල්ල වැටුණු පමණින් රෝගීන් සුව වූ අයුරු ද බයිබලයේ සඳහන් වේ.ක්‍රිස්තුස් වහන්සේම පැවසූ ආකාරයට උන්හන්සේට වඩා මහත් ක්‍රියා උන්වහන්සේගේ අනුගාමිකයන්ට කළ හැකි විය.ඉතින් මෙවන් දෑ අදටත් වලංගුද?එය දැන් සිටින ක්‍රිස්තු අනුගාමිකයන්ට කළ හැකිද?එය බයිබලයට එකඟ වේද?පිළිතුර ඔව්.
යේසුස් වහන්සේ තම උත්ථානයෙන් පසු සවර්ගාරෝහණයට පෙර සිය අනුගාමිකයන්ට පණිවිඩයක් දුන් සේක.ලොව පුරාම තම සුභාරංචිය ප්‍රකාශ කොට පතළ කරන්න යනු එහි එක් කොටසකි.එබැවින් ලොව පුරා කිතු දහම ප්‍රචාරය කිරීම යේසුස් වහන්සේට හා බයිබලයට එකඟය.(බලයෙන් ක්‍රිස්තියානියට හැරවීමට කියා නොමැත).සුව කිරීම් සම්බන්ධයෙන් ගත් කළ,යේසුස් වහන්සේ පැවසූයේ "නුඹලා රෝගීන් පිට අත් තැබූ කල්හි ඔව්හු සුවය ලබන්නෝය.නුඹලා මාගේ නාමයෙන් යක්ෂයන් දුරු කරන්නෝය."යනුවෙනි.එබැවින් රෝගීන්ට හෝ යක්ෂාවේශ වූවන්ට යාඥා කිරීම ද බයිබලයේ කියා නැති දෙයක් නොවේ.එබැවින් අදටත් එය ශ්‍රී ලංකාවේ පමණක් නොව ලෝකය පුරාම සිදු කෙරෙන්නෙකි.අප්‍රිකා මහද්වීපයේ නගර හා රටවල් පිටින් ක්‍රිස්තියානිකරණය වී ඇති අතර ඊට ප්‍රධානතම සාධකය වී ඇත්තේ මෙවැනි සුව කිරීම් ය.මෙහි ඇති වීඩියෝ පටය ඒ ගැන සාක්ෂි දරයි.
http://sa.cfan.org/mission-journal.aspx?id=10652 (මෙය මෙරට පෘතුගීසී මිෂනාරීන් මෙන් කඩුවෙන් කළ පරිවර්තනයක් හෝ මුදල් දී කරන ලද්දක් නො වේ.)
එහෙත් ශ්‍රී ලංකාවේ සිදු වන්නේත් මෙයමද?එසේ නම් රෝහල් හා වෛද්‍යවරු අනවශයද?නැත.රෝහල් තිබෙන්නෙත්,වෛද්‍යවරු සිටින්නෙත් මිනිසුන් වෙනුවෙනි.එබැවින් තමා ලෙඩ වූ විට වෛද්‍යවරයෙකු වෙත යෑම කළ යුතුය.(ඇතැම් කිතුණුවන් මැරුනත් බෙහෙත් නොගන්නා මතයන්වල සිටී.එය ඔවුන්ගේ පුද්ගලික අයිතියකි.එය විවාද නොකළ යුතුයි යන්න මගේ හැඟීම වේ.)එහෙත් වෛද්‍යවරුන්ගේ දැනුම හා හැකියාවන් සීමා වෙන අවස්ථා තිබේ.එවැනි තැනකදී දෙවියන් වහන්සේගෙන් මිස පිහිට පතන්නට කෙනෙක් නැත.මෙවැනි මෙහෙයන්වලට සහභාගිවන්නන් වැඩි දෙනෙක් එවන් අසරණ වූ වෛද්‍යවරුන් ද අත් හළ අයය.
දැන් තවත් ගැටලුවක් තිබේ.මේ ලංකාවේ මෙවන් දෑ සිදු කරන සියලු දෑ නිවැරදිද යනුයි.මක්නිසා ද ක්‍රිස්තුස් වහන්සේ මා මීට පෙර පැවසූ දෑ ප්‍රකාශ කළා සේම තවත් වැදගත් දෙයක් කී සේක.එනම් අන්තිම කාලයේ උන්වහන්සේගේ නාමයෙන් බොහෝ දෙනෙකු පැමිණෙන බවත්,ඔවුන් රෝගීන් සුව කරමින්,යක්ෂයන් දුරු කරමින් ක්‍රියා කළ ද ඔවුන් ජනතාව මුළා කරන්නන් බවයි.එනම් දෙවියන් වහන්සේ දුන් බලය තම ලාබය උදෙසා භාවිතා කරන්නන්ය.එහෙත් මෙම කොස්වත්ත,බත්තරමුල්ලේ පාස්ටර්තුමා ද එම ගනයටම ඇතුලත් කරන්නට මම ඉක්මන් නොවෙමි.මන්ද ඔහු විසින් කරන සේවය ගැන භික්ෂූන් වහන්සේලා ද අගය කරන බව මා අසා දැක ඇති බැවින් ද,මීට පෙරත් මෙවැනි සුව කිරීමේ මෙහෙයන් ඔහු පවත්වා ඇති බැවින්ද,(එහිදී කිසිවෙකු සුව නොවූ යේ නම්,තවදුරටත් මෙවන් දෑ කළ නොහැකියයි මම සිතමි),මා දන්නා පරිදි ඔහු යේසුස් වහන්සේ පැවසූ ආකාරයේ ජනයා මුළා කරන්නෙකු බව කීමට මා සතුව ප්‍රමාණවත් සාක්ෂි නොමැති බැවිනුත්ය.එබැවින් මෙවැන් කරුණු කාරණා හා පුද්ගලයන් ගැන කතා කිරීමේ දී අන්‍යාගමිකයින්ට වඩා කිතුණුවන්ද ප්‍රවේශම් සහිත විය යුතු බව මම අවධාරණය කරමි.
එබැවින් ක්‍රිස්තුස් වහන්සේගේ වචනයට අනුව ක්‍රියාත්මක වන්නන් හැර අනෙකුන් ගැන යුතු ලෙස ක්‍රියා කිරීම කිතුණු ශාසනයට ද හොබනේය.එය මෙරට ආගමික සහජීවනයට මෙන්ම ,යන්තම් ජාතිය මත පදනම් ව ඇතිවුනු ගින්න වසර 30 කට පසුව නිවා ගත් මේ පුංචි රටට ද හිතකර වන්නේය.මේ සිල්ලට පාදක වන සිදුවීම් පෙළ මා පුවත්පතින් කියවූ විස්තර හැරෙන්නට වෙනත් තොරතුරක් නිශ්චිතවම නොදන්නා බැවින් ඒ ගැන විනිශ්චය කිරීම මා හට කළ නොහැක.එයට එරෙහිව නීතිමය ක්‍රියා මාර්ග ගන්නේනම් එය මෙරට නීතියට ද,එසේ එය නොවූවද මෙය දෙවියන් වහන්සේටද විනිශ්චයට භාර දීම හැර කළ හැකි දෙයක් මම නොදනිමි.කෙසේ වුවද "එව,බලව" බුද්ධ වචනයේ සඳහන්ව ඇති ආකාරයට මෙවැනි දෑ ඇවිත් බලන්නට ජනයා සතුව අයිතිය තිබිය යුතු අතර,ගැටලුවක දී ඊට නිසි පරිදි ක්‍රියා නොකොට උන්මත්තකයින් මෙන් හැසිරීම නම් කිසිදු ආගමක අයෙකු අනුමත නොකරනු ඇත.එල්ලාවල හාමුදුරුවන් ගැන මේ බ්ලොග් අඩවිවලින් ඕනෑ තරම්,කතා කර ඇති බැවින් මා උන්වහනසේ බුද්ධ ශාසනය කෙසේ වෙතත්,පංච ශීලය රැකීම ගැන යළි කතා කරන්නට අවැසි නොවේ.