රජතුමාගේ Rථිකේ

"ජාතික ලොතරැයි මණ්ඩලයට අනුබද්ධිත සමාගමක් වශයෙන් පිහිටැවුණු මාර්ගස්ත ලොතරැයි සමාගම (ඔන්ලයින්) හේතුවෙන් ලොතරැයි මණ්ඩලයට රුපියල් අනූඅටකෝටි විසිපන් ලක්ෂ අසූනවදහස් තුන්සිය තිස්හතරක ආයෝජන අලාභයක් සිදුව ඇතැයි මුදල් ඇමතිවරයා වශයෙන් ජනාධිපති මහින්ද රාජපක්ෂ මහතා ඇමති මණ්ඩලවට දැනුම් දී ඇත.මිලින්ද මොරගොඩ මහතා ආර්:sක ප්‍රතිසංස්කරණ හා විද්‍යා තාක්ෂණ ඇමති වශයෙන් මේ ලොතරැයිය හඳුන්වා දුන්නේය.2003 වසරේ ජූනි මාසයේදී පිහිටුවන ලද මෙම සමාගම දිගින් දිගටම පාඩු ලැබීම හා අපේක්ෂිත අරමුණු කරා ළඟා නොවීම හේතුවෙන් 2006 ඔක්තොබර් මාසයේදී ඈවර ‍කෙරුණි. මෙම සමාගමේ දිගු කාලීන ආයෝජන වශයෙන් රුපියල් 78,35,20,200 ක් හා දිගු කාලීන ණය වශයෙන් රුපියල් 20,00,000,00 ඇතුළත්ව කෝටි 98කට අධික මුදලක් ජාතික ලොතරැයි මණ්ඩලය විසින් ආයෝජනය කර තිබිණි. සමාගම ඈවර කිරීමෙන් ලොතරැයි මණ්ඩලයට ලැබී ඇත්තේ රුපියල් දසලක්ෂයකට අඩු මුදලකි." - (නොවැම්බර් 02 ලංකාදීප)

ඉහත දැක්වෙන්නේ අද ලංකාදීප පුවත්පතේ ප්‍රධාන ප්‍රවෘත්තියයි.මෙය දැන් රාජපක්ෂ රජයේ අන්‍යයතාවය බඳු වී තිබේ.මිහින් ලංකා නමින් අහස අපේ කරගන්නට තැනූ ගුවන් සේවය ද පාඩු පිට පාඩු ලැබූ අතර එහෙත්,එය තවදුරටත් ගෙන යනු වස් පසු ගිය අයවැයෙන් ද අති විශාල ලෙස මුදල් වෙන් කරනු දක්නට ලැබුණි.මේ මුදල් මේ රජයේ කිසිවකු ගෙදරින් ගෙනත් අත හරින බූදලයක් නොවේ.එය මේ රටේ මහජනයාගේ මුදල්ය.

යුද්‍ධය ජයගත් මහ රජාණන්ට ආර්ථික යුද්ධය ද ජය ගැනීම කජ්ජක් නොවේ යැයි ඇතැම්හු පාරම් බානු පසු ගිය කාලයේ දක්නට ලැබුණි.එහෙත් ශ්‍රී.ල.නි.ප. ය ප්‍රමුඛ ආණ්ඩුවක් මෙරට ආර්ථිකය කාබාසීනියා කිරීමට වඩා දෙයක් මෙතෙක් නොකළ ආකාරයෙන්ම මේ රජයද ක්‍රියා කරන බව ඒකාන්තය.පසු ගිය සතියේ ජනපති හිටි හැටියේ කිසිම හෙවිල්ලක් බැලිල්ලක් නොමැතිව රාජ්‍ය බැංකු සම්බන්ධයෙන් නියෝගයක් නිකුත් කළේය.රටට හෙණ ගැහුවත් ඡන්දය ජයගත යුතුයයි හිතමින් නිකුත් කළ මේ නියෝගවල ප්‍රතිඵලය වැඩි කල් නොයා දැක ගත හැකි වනු ඇත.එම තීන්දු හා නියෝග මෙරට මූල්‍ය පද්ධතිය හා ආර්ථිකය අස්ථායී කිරීමට හේතු වන බව ආර්ථික න්‍යායන් දන්නෝද පවසති.අනෙක් අතට එම තීරණයෙන් රටේ සාමාන්‍ය ජනයාට නම් ලැබෙන සෙතක් නැත.

දැන් මේ රටේ හැම දේම කරන්නේ රජතුමාය.1 වසරට ළමුන් ඇතුළත් කර ගැනීමේ පටන් හැම දෙයක්ම රජතුමාට කරන්නට වී තිබෙන්නේ ලොව විශාලතම කැබිනට් මණ්ඩලය ද තමා සතුව තිබියදී වීම අතිශයින් කණගාටු දායකය.මඟ නගන්නේත් ජනපතිය.ගම නගන්නෙත් ජනපතිය.වෘත්තීය අරගලවලට මැදිහත් වන්නෙත් ජනපතිය.සරසවි සිසුන් සාකච්ඡා ඉල්ලා සිටින්නෙත් ජනපති සමඟය.පොලිසියෙන් තරුණයන් මරා දැමූවිට ඔවුන්ගේ දෙමාපියන් සමඟ සාකච්ඡා කරන්නෙත් ජනපතිය.මොකද පත් කර සිටින එකෙක්ටවත් දෙන වැඩක් හරියට කරගන්නට බැරි නිසාය.මේ ලිපියේ ඉහළින්ම දැක් වූයේද එවැන්නෙකුගේ හපන් කමක්ය.එ.ජා.ප. නායකයා සමඟ රට හදන්න බෑ කියා මහින්ද මහත්තයාගේ දෑත් ශක්තිමත් කරන්නට ගිහින් රටට වැඩ කරන්නේ ඒ ආකාරයටය.එලෙසම ආණුඩුවට ගිය තවත් අයෙක් ලක්ෂ 44 ක් වැය කරමින් තමන්ගේ දුවට උපන් දින සාදයක් පැවැත්වූ හැටිද අපිට මතකය.
අමාත්‍ය මණ්ඩලය මේ ආකාරයෙන් බරටම වැඩ කරගෙන යද්දී ජනාධිපති තුමා ද මහ බැංකුව සමඟවත් හරි හැටි සාකච්ඡා නොකොට බැංකුවලට වැඩ දෙන්න ගියේය.මහින්ද මහත්තයාගේ ආර්ථිකේ එහෙමය.අන්තිමට මේ ‍අවුරුද්දේ අපේ රටේ අයවැයකුත් නැත.රජතුමා යුද්ධය දිනපු ගමන් ඔක්කොම හරි කියා හිතූ අයට දැන්වත් මොළේ පෑදුනොත් හොඳය.
මොකද මහ පාරේ යන කොට ඇඟේ හැප්පෙන තරම් කටවුට් ගසා පිම්බී රජතුමෙක් වුණාට මහින්ද මහත්තයා යුද්ධය දිනුවේ තනියෙන් නො‍වේ.මහින්ද මහත්තයාට යුද්ධෙ හිතේ හිටියට කරන්න ඕනෙ විදියට හැම දේම හරි බරි ගැහී තිබුණු නිසාය.හැබැයි ආර්ථික යුද්දෙ මේ විදියට කරන්න ගියොත් ආයේ මේ ආණ්ඩුව ඉන්නකම් අය-වැයක් නම් දකින්නට නොලැබෙනු ඇත.