සිරිසේන ඇමතිතුමාගේ ඓතිහාසික සමුළුව

ශ්‍රී.ලං.නි.ප. 19 වන මහ සමුළුව ඊයේ මහත් උත්කර්ෂවත් ලෙස කොළඹදී පැවැත්විණි.මේ සමුළුව පැවැත්වෙන්නට මත්තෙන් අදහස් ප්‍රකාශ කර තිබූ පක්ෂ ලේකම්වරයා පවසා තිබුණේ මෙය ඓතිහාසික සමුළුවක් වනු ඇති බවයි.පක්ෂ සම්මේලනය ආරම්භයේ සිට අවසානය වන තුරුම මුව අයා බලා සිටිය මට මේ වන තෙක්ම එයින් රටට හෝ ජනතාවට ඓතිහාසික වූ යමක් ලැ‍බුණු බවක් සොයාගන්නට නොහැකිවිය.එහෙත් දැන්නම් එය මටත් ටික ටික තේරෙන්නට පටන් ගෙන තිබේ.
ඊයේ පැවති මෙම පක්ෂ සම්මේලනය සජීවිව විකාශය කරනු ලැබුවේ ජාතික නාලිකාවෙන් පමණක් නොවේ.හරබර,සමබර පුවත් ඔබට ගෙනෙන තවත් පුද්ගලික නාලිකා දෙකක් ද තම අනෙක් වැඩසටහන් පසෙක තබා මෙය සජීවි ලෙස විකාශය කිරීමට යෙදුනි.(එය මුදල් ගෙවා ප්‍රචාරය කරන ලද්දක් දැයි මම නොදනිමි.) සමුළුව ඓතිහාසික නොවේ නම්,එවැන්නක් වීමට ද ඉඩ නැත.එබැවින් එය අවසන් වන තුරුම නරඹන්නට මම ද අමතක නොකෙළෙමි.ඊට කදිම නර්තනයක් හා මහින්ද මහතාගේ වීරත්වය හා නායකත්වය පෙන්වන නර්තනයක් ද ඉදිරි පත් කොට තිබුණි.එය ඉදිරිපත් කර තිබුණේ ජාතික තරුණ සේවා සභාවේ තරුණියන් 2000 කට අධික පිරිසක් විසිනි.දැන ගන්න ලැබෙන ආකාරයට ඔවුන් සඳහා පමණක් වියදම රු.පක්ෂ 90 කට ආසන්නය.රටපුරා කළ සැරසිලිවලට වියදම ගණන් බලා නැත.මෙය ඓතිහාසික හා වැදගත් සමුළුවක් නොවේ නම්,ජනතාවගේ මුදල් මෙසේ නිකරුණේ රජය නාස්ති කරන්නේ ද නැත.එබැවින් මෙහි විශේෂත්වයක් තිබිය යුතුමය.මේ රටට වැඩිම සේවයක් කළ හා කරන පක්ෂය මෙය බව ජනපති තුමා ගිරිය කඩා ගෙන කෑ ගසා කීවේ,ඒ නිසා විය හැකිය.
ඒ ගැනනම් මොකට කියනවා ද?ශ්‍රී.ල.නි.ප.යේ නිර්මාතෘවරයා වූ බණ්ඩාරනායක මැතිතුමා 1956 සිංහලකම පෙරට දමා බලය ලබා ගත්තේය.එමඟින් මෙරට සුළු ජන කොටස්වලට අරගල කරන්නට අවශ්‍ය සාධකයන් නිපද විණි.සරලව කියතොත් අද රාජපක්ෂ මහතා නැති කරා යැයි කියන්නේ බණ්ඩාරනායක මහතා විසින් විස බීජ වපුරා බිහි කළ ත්‍රස්තවාදයකි.එබැවින් එය ශ්‍රී.ල.නි.ල.ප.යෙන්ම උපන් බව එතුමාට කියන්නට අමතක වුණි.1994 එ.ජා.ප. ය පරදා බලයට පැමිණි පොදු පෙරමුණද එදා ශ්‍රී ලංකා රජය සතුව තිබූ පුනරීන්,අලිමංකඩ,මුලතිව් වැනි ප්‍රබල හමුදා කඳවුරු කොටියාට අත් පත් කර දුන්නේය.තමාගේ නායකත්වය යටතේ මේ නැවත අල්ලා ගත්තේ තම රජයන් විසින්ම අහිමි කර ගත් දේ බවද ජනපතිතුමාට අමතක වී ඇත.බලන් යනකොට,ප්‍රශ්න ඇති කර,ප්‍රශ්න නැති කරන්නට ශ්‍රී.ල.නි.ප.ය. සමත්ය.ඒ හැරෙන්න රටට ඉතිරි වෙන දෙයක් කළ බවක් මතක නැත.
ඊයේ ශ්‍රී.ල.නි.ප. සමුළුව වර්ණවත් කළේ ජාතික තරුණ සේවා සභාවෙනි.ජාතික තරුණ සේවා සභාව එ.ජා.ප. ය මෙරට තරුණ තරුණියක්ට දායාද කළ විශිෂ්ට සම්පතකි.අද එයත් තම කෙරුවාව කියන්නට යොදා ගෙන ඇත්තා මිසක,එවන් වූ නිර්මාණශීලී සංකල්පයක් ශ්‍රී.ල.නි.ප.ය. කිසිදාක ඉදිරිපත් කොට නැත.(තරුණයන්ට පොලිසීයෙන් ගහනකොට ඇහැක් ඇර බලන්නේ නැති,"නාමල්ට හෙටක්" සංවිධානය හැරුණු විට).
එබැවින් මේ කරුණු කාරණා ඔක්කොම ගෙන බලන විට මේක මාරම ඓතිහාසික පක්ෂ සමුළුවකි.මෙය ජාතික සමුළුවකි.එසේ නැතිනම් එ.ජා.ප. යේ හා ජ.වි.පෙ. මහා සමුළු ද මෙසේ අනෙක් නාලිකාවලින් පෙන්නන්ට ඕනෑය.එබැවින් මෙය ලංකාවේම සමුළුවකි.මීට පෙර මෙවැනි විකාශයන් සිදුවූයේ ජාතින උත්සව,රටේ අති විශේෂිත අවස්ථාවලදී හා ජනපතිවරයාගේ විශේෂ ප්‍රකාශයන් සඳහා පමණි.එබැවින් ශ්‍රී.ල.නි.ප. සමුළුව යනු ජාතික උත්සවයක් බැවින් මීට පසුව හෝ ඊට සහභාගිවන්නට මේ රටේ හැම පුරවැසියාම උත්සුක විය යුතුය.සිරිසේන ඇමතිතුමා මෙය ඓතිහාසික සමුළුවක් කියා ඇත්තේ කට කහනවට නොවේය.