හදිසි ජනාධිපතිවරණයට හේතු දැක්වීම

වසර 2011 වන තුරු ජනපති ලෙස ධූරය දැරිය හැකිව තිබූ වත්මන් ජනපතිවරයා වසර 4ක් නික්මෙන විටම ජනාධිපතිවරණයක් කැඳවා තිබේ.යුද්ධය ජයගත් පසු මහත් ජනාදරයට පත් වූ වත්මන් ජනපතිවරයා හදිසියේම තම ධූර කාලය අඩු කරගනිමින් මෙලෙස ජනාධිපතිවරණයක් කැඳවා තිබෙන්නේ ඇයි?.ඊට හේතු දක්වමින් ජනපතිවරයා සඳහන් කර ඇති කරුණු අතිශයින්ම අතාත්විකය.අතාර්කිකය.ජනපතිවරයා මෙවැනි බොළඳ හේතු දැක්වීමක යෙදෙනු ඇතැයි අපි කිසිවිටෙක බලාපොරොත්තු නොවුනෙමු.
ජනාධිපතිවරයා පවසා ඇත්තේ මේ ජනපතිවරණය කැඳවා ඇත්තේ පසු ගිය මැතිවරණවලදී ඡන්දය දෙන්න නොහැකි වූ බොහෝ පිරිසක් වූ ජනතාවට තම ඡන්දය පාවිච්චි කිරීම සඳහා අවස්ථාව ලබා දී ඡන්ද අයිතිය සුරැකීමට බවයි.හදිසියේම තම ධූර කාලයද අඩු කර ගෙන ජනපතිවරයා මේ හදන්නේ ජනතාවගේ ඡන්ද අයිතිය සුරැකීමටද?උතුරු නැගෙනහිර ඡන්දය භාවිතා කිරීමට නොහැකි වූ විශාල පිරිසකට දැන් ඡන්දය භාවිතා කිරීමට හැකි බැවින් ඒ සඳහා අවස්ථාවක් ලබා දීමට මෙමඟින් හැකි බව ජනාධිපතිවරයා ප්‍රකාශ කොට තිබේ.ඔහු පවසන ආකාරයට එතුමා බලා ගෙන සිට ඇත්තේ යුද්ධය නිම වූ පසු කොයි මොහොතේ තම වසර 4 සම්පූර්ණ වෙයිද කියාය.මන්ද ඉක්මනින් ජනපතිවරණය පැවැත් විය යුතු නිසාය.(4කට පෙර ඡන්දයට යන්න ව්‍යවස්ථාවෙන් බලය තිබුණේ නම් මීටත් කලින් ඡන්දයට යා හැක.)එහෙත් මෙම තීරණය ගැනීමට ආණ්ඩුව දැක් වූ අපහසුතාවය දෙස බලන විට නම් එය එසේ යැයි සැලකිය නොහැක.අනෙක් කාරණය වන්නේ ඡන්දය දීමට නොහැකි වූ අයට ඡන්දය දීමට ළඟදීම වඩාත් සුදුසු අවස්ථාවක් මහ මැතිවරණය හරහා ලැබෙන්නට තිබෙන නිසා ‍හදිසියේ ඡන්ද අයිතිය සුරැකීමට ජනාධිපතිවරණයකට යා යුතු ද?ඒ වන විට යළි පදිංචි කිරීම්ද මුළුමනින්ම අවසන් වනු ඇත.එවිට සැබැවින්ම සියළුම දෙනාට ඡන්දය පාවිච්චි කළ හැක.ඡන්ද අයිතිය සුරැකිය හැක්කේ හැකි තරම් මැතිවරණ පැවැත්වීමෙන් නොවේ.ඡන්ද දායකයාට සිය අයිතිය නිදහසේ පාවිච්චි කිරීමට අවැසි වට පිටාව සකසා දීමෙන් එය කළ හැකිය.
තව දුරටත් රාජපක්ෂ මහතා ප්‍රකාශ කරන්නේ තමා වසර 6කට පොරොන්දු වූ මහින්ද චින්තනයෙන් 90%ක් වසර 4කදී නිම කළ හැකිවූ බවයි.එසේ නම් එතුමාට තවත් ඉතිරිව ඇත්තේ 10%කි.ඒ සඳහා තවත් වසර දෙකක් එතුමාට ජනතාව ඉතිරි කර තිබියදී එතුමා පවසන්නේ තමා ඉදිරි කටයුතු සඳහා ජනවරමක් ඉල්ලා සිටින බවයි.මෙය මහ බහුභූත කතාවක් නොවේද?ජනතාව රට කරවන්ට වසර 6කට බලය දුන් විට,වසර 4කින් 90%ක් කළ බැවින් ඉතිරි 10% සඳහා ජනවරමක් ඉල්ලා සිටිය යුතු නැත.එතුමා කළ යුතුව තිබුණේ ඉතිරි 10% ඉදිරි වසර දෙකේදී නිම කර,තමා ජනතාවට දුන් සියල්ල ඉටු කළ ජයග්‍රාහී අපේක්ෂකයෙකු ලෙස මී ළඟ ජනාධිපතිවරණයට පැමිණීමයි.හදිසි ජනපතිවරණයකට යෑම ගැන දක්වන හේතු අතාත්විකයැයි මා පවසන්නේ මේ පදනම මතය.
එදා ශ්‍රී.ල.නි.ප. මහ සමුළුවේදී එතුමා පැවසූයේ තමාගෙන් ජනතාව ඉල්ලන ඕනෑම දෙයක් දෙන්නට සූදානම් බවයි.එවිට ජනපතිවරයා මෙසේ ද කීවේය;"තමුන්වහන්සේලාට මොනාද ඕනෙ කියලා කට ඇරලා කියන්නකෝ.....".මා සිතුවේ ජනතාව පඩි වැඩි කරන්න ඉල්ලාවි කියාය.රැකියා ලබා දෙන්න කියා ඉල්ලයි කියලාය.ජීවන වියදම අඩු කරන්න ඉල්ලයි කියාය.එහෙත් ජනතාව ඉල්ලන්නට මත්තෙන් තමා දෙන්නට ඉන්නේ මොනවාද කියා ජනපතිවරයා කීවේය.තමා ජනතාව ඉල්ලන ඕනෑම දෙයක් ලෙස අදහස් කර ඇත්තේ මැතිවරණ බව මටත් පසුවට තේරැම් ගියේය.ජනතාවට තියෙන්නේ මොන මැතිවරණයද කියා තෝරා ගැනීමට පමණය.දැන් ජනතාවට ඕනෑවී ඇත්තේ මැතිවරණ ද?ශ්‍රී.ල.නි.ප. සමුළුව යනු සියලු රට වැස්සන්ගේ කැමැත්ත නියෝජනය කරන අවස්ථාවක්ද?එහි සිටියේ සාම්ප්‍රදායික ශ්‍රී.ල.නි.ල.ප. පාක්ෂිකයින්,නිකං දෙනවනම් මොන බස් එකේ හිරි කොළඹ එන්න සිටි අය,කරටි කැඩෙන්න බී ගෙන වැටෙන්න කැමති අයය.මේ අයට මැතිවරණ අවශ්‍ය වීම යනු රටටම එය අවශ්‍ය බවද?සිරිපාල ඇමතිවරයාට අනුවනම්,බත් කන ජනතාව ඉල්ලන්නේ ජනාධිපතිවරණයකි.ඒ නිසා තමා කැඳවූ හදිසි මැතිවරණය සාධරණීය කිරීමට පුහු හේතු නොදක්වා ජනපතිවරයාට කීමට තිබුණේ, "බත් කන ජනතාව එක හඬින් ජනාධිපතිවරණයක් ඉල්ලූ නිසා මම ජනාධිපතිවරණයක් කැඳවූයෙමි" කියාය.එය වඩා සාධාරණ හේතුවක් වීමට ඉඩ තිබුණි.