කිතුණුවනි අවදිවව් ! කිතු සසුන රැක ගනිව් !

යාඥාවෙන් සුවවෙන්නට ගොස් කාන්තාවන් දෙදෙනෙකු මිය ගිය සිදු වීම ගැන සමාජයේ නිර්මාණය වූ කතිකාව තවම නිමවී නොමැත.ඒ පිළිබඳ කරුණු බයිබලය හා ක්‍රිස්තුස් වහන්සේගේ වචන ඇසුරින් විග්‍රහ කරමින් මා මීට පෙර මෙම බ්ලොග් අඩවියෙන්ම ලිපියක් ඉදිරිපත් කළෙමි.එමඟින් මා පෙන්වා දුන්නේ රෝගීන් උදෙසා යාඥා කිරීම හෝ සුභාරංචිය ප්‍රකාශ කිරීම බයිබලට එකඟ බවත්,එය ක්‍රිස්තුස් වහන්සේගේ ඉගැන්වීමට කිසි ලෙසකින්වත් පරස්පර නොවන බවත්ය.(මතෙව් 10:8 හා මාර්ක් 16:17 හා 18 පද)කරුණා කාරණා එසේ නම්,මෙයින් වඩා අසරණභාවයට පත් වන්නේ කිතුණුවන් ය.සමාජයම මේ අයට විරුද්ධ වෙද්දී කිතුණුවන් ලෙස අප කුමක් කරමුද කියා තුෂ්නිම්භූතව බලා සිටිමු ද?මන්ද මේ මෙහෙයන් පැවැත් වූ අයද භාවිතා කළේ යේසුස් යන නාමයයි.ඔවුන්ගේ අතේ වූයේ ද බයිබලයයි.ඔවුන් පවසන්නේ ද දෙවියන් වහන්සේ ගැනයි.කිතුණුවා තුළ ඇති දෙවියන් වහන්සේ ගැන වූ ගරු බිය නිසාම මෙවැනි සිද්ධීන්වලදී ඔවුන් අසරණවීම ස්වභාවිකය.එබැවින් මා මේ ලිපියෙන් පෙරට වඩා එහා ගිය අදහසක් මතු කරන්නට උත්සාහ ගනිමි.මීට පෙර ලිපියේ දී මා;
"දැන් තවත් ගැටලුවක් තිබේ.මේ ලංකාවේ මෙවන් දෑ සිදු කරන සියලු දෑ නිවැරදිද යනුයි.මක්නිසා ද ක්‍රිස්තුස් වහන්සේ මා මීට පෙර පැවසූ දෑ ප්‍රකාශ කළා සේම තවත් වැදගත් දෙයක් කී සේක.එනම් අන්තිම කාලයේ උන්වහන්සේගේ නාමයෙන් බොහෝ දෙනෙකු පැමිණෙන බවත්,ඔවුන් රෝගීන් සුව කරමින්,යක්ෂයන් දුරු කරමින් ක්‍රියා කළ ද ඔවුන් ජනතාව මුළා කරන්නන් බවයි.එනම් දෙවියන් වහන්සේ දුන් බලය තම ලාබය උදෙසා භාවිතා කරන්නන්ය.එහෙත් මෙම කොස්වත්ත,බත්තරමුල්ලේ පාස්ටර්තුමා ද එම ගනයටම ඇතුලත් කරන්නට මම ඉක්මන් නොවෙමි.මන්ද ඔහු විසින් කරන සේවය ගැන භික්ෂූන් වහන්සේලා ද අගය කරන බව මා අසා දැක ඇති බැවින් ද,මීට පෙරත් මෙවැනි සුව කිරීමේ මෙහෙයන් ඔහු පවත්වා ඇති බැවින්ද,(එහිදී කිසිවෙකු සුව නොවූ යේ නම්,තවදුරටත් මෙවන් දෑ කළ නොහැකියයි මම සිතමි),මා දන්නා පරිදි ඔහු යේසුස් වහන්සේ පැවසූ ආකාරයේ ජනයා මුළා කරන්නෙකු බව කීමට මා සතුව ප්‍රමාණවත් සාක්ෂි නොමැති බැවිනුත්ය.එබැවින් මෙවැන් කරුණු කාරණා හා පුද්ගලයන් ගැන කතා කිරීමේ දී අන්‍යාගමිකයින්ට වඩා කිතුණුවන්ද ප්‍රවේශම් සහිත විය යුතු බව මම අවධාරණය කරමි."
යනුවෙන් කොටසක් ලියා ඇත.එහිදී මා ප්‍රකාශ කළේ යේසුස් වහන්සේ ප්‍රකාශ කළ අනාවැකියට අනුව ලොවට බිහිවන මුළා කරන්නන්ගේ ගනයට අදාළ සිද්ධියට සම්බන්ධ පාස්ටර්වරුන් අයත් වේ යැයි කියන්නට තරම් ඒ වන විට මා හට ප්‍රමාණවත් කරුණු නොමැති බවයි.එහෙත් දැන් පැවැත්වෙන පොලිස් පරීක්ෂණ හමුවේ කරුණු රැසක් අනාවරණය වෙමින් තිබේ.එම නිසා මෙම කරුණ ගැන පෙරට වඩා ගැඹුරෙන් බැලීමට මටද හැකියාව ලැබී තිබේ.
මා මෙම දේවස්ථානයට කිසි විටෙක ගොස් නොමැති අතර එක් දිනක් මීට ඉහතදී විහාර මහා දේවී උද්‍යානයේම පැවැත් වූ මෙහෙයකට සහභාගි වී ඇත.එහෙත් එදින එහි ඇතුළු වන කිසිවෙකුගෙන් කිසිම අය කිරීමක් කරනු ලැබුවේ නැත.එහෙත් දැන් කරුණු අනාවරණය වන අන්දමට මෙම සිද්ධිය සිදුවූ මෙහෙයට පැමිණෙන සැමගෙන් රු.20 බැගින් අය කළ බව කියවේ.තවද රැස්ව සිටින අයගෙන් මුදල් එක් රැස් කිරීම හා 20ට වැඩි ගණනක් ලබා දෙන ලෙස ඉල්ලා ඇති බවද සාක්ෂිවලදී කියවී ඇත.මේ අනුව මෙය සේවයක් නොව ව්‍යාපාරයක් බවට පත් ව ඇති බවක් පෙනේ.අනෙක් අතට මෙය සමාගමක් ලෙස ලියාපදිංචි කර ඇති බවද වාර්තා වේ.මෙම කරුණු සැලකිල්ලට ගැනීමේදී යමක් පැහැදිලි වේ.මොවුන් මේ පෙන්වන්නේ සැබෑ දේව සේවයක් නොවේ.දෙවියන් වහන්සේගේ බලය යොදා ගෙන එය ව්‍යාපාරයක් දක්වා පරිවර්තනය කර ගෙන ඇති බවක් මෙමඟින් අවබෝධ වේ.
ක්‍රිස්තියානි සභා ලෙස හා දේවස්ථාන නමින්ම මෙරට ලියාපදිංචි වූ බොහොමයක් ස්ථාන තිබේ.ඒවා සමාගම් නොවේය.එම ස්ථානවලද මෙවැනි මෙහෙයන් පැවැත්වීම හා රෝගීන් උදෙසා යාඥා කිරීම සිදුවේ.එහෙත් මෙලෙස විශාල ක්‍රීඩාංගණවල මෙහෙයන් නොපවත්වන අතර,බොහෝ විට එම දේවස්ථානයේම පැවැත්වේ.මන්ද මෙවැනි විශාල මෙහෙයන් සංවිධානය කිරීමට විශාල මුදලක් අවශ්‍ය වේ.එබැවින් ගැටළු මතුවන්නේ මෙවැනි සමාගම් හා තනි පුද්ගලයන් විසින් මෙහෙයවන මධ්‍යස්ථාන නිසාය.මේවාට නිශ්චිත දර්ශනයකට වඩා අදාළ පුද්ගලයාගේ හිතුමනාපයට කටයුතු කිරීමට යාමෙන් කිතුණු ඉගැන්වීමට විරුද්ධ දේ ඇතුළු වන බව මගේ හැඟීමයි.
මී ළඟ ගැටලුව මතු වන්නේ මෙම ස්ථානවල සිදුවන සුව කිරීම් සම්බන්ධවයි.සැබෑ ලෙසම මෙහි රෝග සුවකිරීම් සිදුවී ඇති බව බොරුවක් නොවේ.එය බොරුවක් විය නොහැකි බව මෙම ස්ථානයට වැල නොකැඩී පැමිණෙන පිරිස්වලින්ම සිතාගත හැකිය.එසේ පැමිණෙන අය සුව නොවුනි නම්,ඉන් පසු පැවැත්වෙන මෙහෙයට සිටියාටත් වඩා අධික් පිරිසක් සහභාගී වීම ප්‍රායෝගික කාරණයක් නොවේ.තවද මෙතෙක් අදාළ දේවස්ථානයේ පැවති මෙහෙය සෑම සෙනසුරාදාවකම විහාරමහා දේවී උද්‍යානයේ පැවැත්වීමට හේතු වී ඇත්තේද එහි පැමිණෙන පිරිසට ඉඩ නොමැති වීම නිසාය.එබැවින් මෙම ස්ථානය තුළ සුවකිරීම් විශාල වශයෙන් සිදුවී ඇති බව මෑත සිදුවූ මරණයන් දෙක නිසා වෙන් පමණක් බොරු කළ නොහැක.මන්ද මෙවැනි කියමනක් තිබේ.එනම්;"එක් අයෙකු බොහෝවරද,බොහෝ දෙනෙකු එක් වරද රැවටිය හැක.එහෙත් බොහෝ දෙනෙකු බොහෝ වර රැවටිය නොහැක" යනුවෙනි.
එසේ නම් වරද කාගේද?ශු.බයිබලයට අනුව දෙවියන් වහන්සේ විසින් උන්වහන්සේගේ අනුගාමිකයන්ට විවිධ දීමනා දෙනු ලබයි.ඒවා නම්;රෝග සුව කිරීම,යක්ෂයන් දුරු කිරීම,අනාගත වාක්‍ය පැවසීම ආදී තවත් විවධ හැකියාවන්ය.(බයිබලයේ මේවා තලෙන්ත ලෙස ද හඳුන්වයි,මාර්ක් 16 පරිච්ඡේදය 11 සිට 20 පදය දක්වා).මේ කිසිවක් අදාළ පුද්ගලයගේ හැකියාවක්,බලයක් හෝ හොඳකමක් නොව දෙවියන් වහන්සේ විසින් අනෙක් මිනිසුන්ට සේවය කිරීම සඳහා දෙන වරයන් වේ.එහෙත් මේවා ලබාගත් පසු කාලයත් සමඟ ඇතැම් පුද්ගලයන් මේ බලය අනිසි ලෙස භාවිතා කරන්නට පටන් ගනී.එවැන්නන්ට වැඩි දුරක් යෑමට ඉඩ නොලැබෙන බව මේ සිදුවීමෙන් තහවුරු වී තිබේ.එබැවින් දෙවියන් වහන්සේ දුන් වරය තමාට මුදල් උපයා ගැනීමට යමෙකු භාවිතා කරන්නේ නම්,ඔහුට මේ රටේ නීතිවලින් කෙසේ වෙතත් දෙවියන් වහන්සේගෙන් සුදුසු විපාකය ලැබෙනු ඇත.ඇතැම් දේශකයින් තමාට ලැබුණ එම වරය තමාගේ බලයක් ලෙස හුවා දක්වමින් දේශනා කරනු මා විවධ මාධ්‍යවල ද දැක තිබේ.මේවා දේව වචනයට එකග නොවේ.එබැවින් යමෙක් ‍සුවකිරීමේ මෙහෙයකට හෝ වෙනත් සුභාරංචි මෙහෙයකට එන්නන්ගෙන් සතයක් හෝ අය කරන්නේ නම්,ඒ ගැන කථා කිරීමට දෙයක් ඉතිරි නොවේ.ඔවුන් පැහැදිලිවම ‍කරන්නේ ව්‍යාපාරයකි.දෙවියන් වහන්සේට අවශ්‍ය සේවකයින් මිස ව්‍යාපාරිකයන් නොවේ.තවද යම් දේශකයෙකු හෝ පිස්ටර්වරයෙකු යැයි කියා ගන්නා අයෙක්;මා වෙතට රෝගීන් ගේන්න,මම සුව කරමි,මම මෙය කරමි,මම එය කරමි,මට පුළුවන් යනුවෙන් පුරසාරම් දොඩයි නම්,ඔහු තවදුරටත් දේව සේවකයෙකු ලෙස සැලකිය නොහැක.රෝගීන්ට පහර දීම,බෙලි මිරිකීම,ශාරීරික තාඩන පීඩන කර රෝග සුව කරන ක්‍රමයක්ද බයිබලයේ සඳහන් නොවේ.එබැවින් මොවුන් රෝගීන් සුව කරතත්,බයිබලය අතේ තබා ගෙන සිටියත්,යක්ෂයන් දුරු කරතත් එබඳුවූවන් ගැන සමාජය දැනුවත් කිරීමේ වගකීම කිතුණුවා ඍජුව භාර ගැනීම යුගයේ අවශ්‍යතාවයකි.නැතිනම් එමඟින් අන්තවාදී ආගම්වාදීන්ට හා මුළුමනින්ම කිතුණු විරෝධීවූ සුළුතරයට අප මෙරට කිතු සසුනට එරෙහි වන්නටත්,ආගම්වාදය පෝෂණය කරන්නටත් රුකුල් දෙනු ඇත.එය මෙරට ආගමික සහජීවනයට මරු පහරක් වනු ඇත.
එබැවින් ක්‍රිස්තුස් වහන්සේ මෙබඳුවූවන් ගැන කල් තියා ප්‍රකාශ කර ඇති බව කිතුණුවන් මනා කොට අවබෝධ කර ගත යුතුය.(මාර්ක් 13:22,23 හා මතෙව් 7:22,23 ).මා ද මීට පෙර මෙම ස්ථානය ගැන වැඩිපුර කරුණු දැන සිටියේ නැත.අනෙක් අතට ඇතැම් ආගමික අන්තවාදීන් ගොඩනඟන බොරු චෝදනා ද වන බැවින් මේ සියල්ල ගැන එක වර නිගමනයකට ඒමට අපහසුය.
එබැවින් ඉදිරියේදී හෝ මෙවැනි ස්ථාන හා පුද්ගලයන් සම්බන්ධයෙන් කිතුණුවන් ලෙස අවබෝධ කරගැනීමේ හැකියාව අප සතු විය යුතුය.මෙවන් සිදුවීම් සිදුවීමට ඉඩදීමෙන් අගෞරවයට ලක්වන්නේ සමස්ථ ක්‍රිස්තියානි සභාවයි.තනි පුදගලයන් ඉස්මතු වෙමින් පවත්වා ගෙන යන මෙවැනි විශාල ජනකායන් රැස් කරන තවත් සංවිධාන/සමාගම් කීපයක්ම තිබේ.එබැවින් මේවා බයිබලය සමඟ සසඳා ඊට එකඟ වේද නැද්ද යන්න අපටම තීරණය කළ හැක.එය අද සිදු විය යුතු කාලීන අවශ්‍යතාවයක් වේ.එබැවින් හතු පිපෙන්නාක් මෙන් ඇතිවෙන මෙවැනි මධ්‍යස්ථාන නවතා සැබෑ කිතුණු සභාව රැක ගැනීමට පෙළ ගැසෙන ලෙස මම සියලු කිතුණුවන්ට ආදරයෙන් ඇරයුම් කරමි.